ტერმინ „აფხაზეთის“ გააზრებისთვის ისტორიის სახელმძღვანელოებში

ანოტაცია

აფხაზეთი დღეს ოკუპირებული ტერიტორიაა და მასთან უშუალო კონტაქტის საშუალება ქართულ საზოგადოებას და მოსწავლეებს არ გააჩნიათ. საკითხის აქტუალობის გამო მიზნად დავისახეთ, გამოგვე­კ­ვ­ლია „ჩვენი საქართველოს“ და „ისტორიის“    გრიფირებული სასკოლო სახე­ლ­მძღვანელოების  (ერთ-ერთ ძირითად სასწავლო რესურსების)  შინაა­რ­სო­ბ­რივი ნომენკლატურა, რომლის საფუძველზეც უნდა ჩამოუყალიბდეს მოს­წა­ვლეს წარმოდგენა ტერმინ „აფხაზეთთან“ დაკავშირებით; უწყობენ თუ არა ისინი ხელს (ან რამდენად უწყობენ) იმ უნარების გამომუშავებას, რომელთა ოპერირებით მოსწავლეები ლოგიკური დასკვნების გაკეთებას შეძლებენ მო­ცე­მულ ტერიტორიულ ერთეულთან  დაკავშირებით, მათ შორის  ტერი­ტო­რიული პრობლემების  განხილვის დროს.

ეს აქტუალური საკითხია სასწავლო-მეთოდური კუთხითაც, რადგან მე­სამე თაობის   ეროვნული სასწავლო გეგმა უშუალოდ მოითხოვს სასწავლო პროცესის ცნებითი კატეგორიებისა და თემების დამუშავების საფუძველზე წარმართვას და, შესაბამისად, მნიშვნელოვანია ის მასალები და რესურსები, რომელსაც „აფხაზეთთან“ დაკავშირებული თემების შესწავლისას ვთა­ვა­ზობთ მოსწავლეებს. 

საკითხის შესწავლამ გვიჩვენა, რომ „ჩვენი საქართველოს“, „ისტო­რიის“ გრიფირებულ  სასკოლო სახელმძღვანელოში („ჩვენი საქართველო“, VI კლასი, მოსწავლის წიგნი, გამომცემლობა „კლიო“, 2018; „ჩვენი საქა­რ­თ­ვე­ლო“, VI კლასი, მასწავლებლის წიგნი, გამომცემლობა „კლიო“, 2018; ის­ტორია, VII კლასი, მოსწავლის წიგნი, გამომცელობა „ლოგოს პრესი“, 2020; ის­ტორია, VII კლასი, მასწავლებელის წიგნი, გამომცელობა  „ლოგოს პრესი“, 2020; ისტორია, VII კლასი, მასწავლებელის წიგნი,  გამომცელობა  „დიოგენე“, 2019; ისტორია, VII კლასი,  გამომცელობა  „დიოგენე“, 2019;  ისტორია; VIII კლასი,  გამომცელობა  „დიოგენე“,2020; ისტორია, VIII კლასი, გამომცელობა „ლოგოს პრესი“, 2020; ისტორია,  IX  კლასი, გამომცელობა  „დიოგენე“, 2020;  ის­ტორია,  IX  კლასი, გამომცემლობა „ლოგოს პრესი“, 2020; მოსწავლის წიგნი) წარმოდგენილი ტერმინოლოგიური და მეთოდური აპარატი, ნა­რა­ტი­უ­ლი და ვიზუალური მასალები  ნაკლებად იძლევა ისტორიულ-გეოგ­რა­ფიუ­ლი „აფხაზეთის“ და „აფხაზის“ გააზრებისა და „საქართველოსთან“ და „ქარ­თ­ველთან“ მათი ურთიერთმიმართების დანახვის საშუალებას (და, ზო­გა­დად, არასაკმარისია სანიგია-აფშილია-აბაზგიის და ეგრისი/ლაზიკას შე­სახებ ცოდნის ჩამოყალიბებისთვის),  არც  სავარჯიშოები უბიძგებენ  მოს­წა­ვ­ლეებს  უფრო ღრმა ლოგიკური კავშირებისა და კვლევითი სამუშაოს შესრუ­ლე­ბისკენ და აღნიშნულ თემაზე სწორი წარმოდგენების ფორმირებისკენ.

მნიშვნელოვანია, ტერმინ „აფხაზეთთან“ დაკავშირებით მოს­წა­ვ­ლეებს შევთავაზოთ მრავალფეროვანი ნარატიული მასალა, ისტორიული წყაროები, რუკები და სავარჯიშოები, აქტიურად გამოვიყენოთ მედიაწიგ­ნიე­რე­ბის მიდგომები და მათი ცოდნა, დამო­კი­დე­ბუ­ლე­ბები და წარმოდგენები ისტორიული-გეოგრაფიული აფხაზეთის მიმართ გაცილებით ღრმა და სა­ფუ­ძ­ვლიანი იქნება, გამოუმუშავდებათ ის უნარები, რომელიც საკითხების ღრმად კონტექსტუალიზაციის საშუალებას მისცემს.